Mo le silafia o e o le a palota Aso 4 Mati 2011 i Samoa

AUTALAVOU MO TAEAO

Matou te vala'au atu ma le fa'anaunau ia Samoa atoa

O ou pa'ia ma ou Sa ua maualuga tele e leai so matou poto e agatonuina.

Peita'i i le agaga o le Taeao o le Talalelei i Mataniu Feagai ma le Ata, matou te fa'alatalata atu ai e fa'apenei:-

Tatou Su'e Fa'atasi Se manuia o Samoa a Taeao - e auala mai i faiga palota ua sauni atu iai Samoa i le Aso Faraile Aso 4 Mati 2011

O Tulaga nei ua matou 'ai'oi ai i le Atua le Tupu Silisili o Samoa ina ia lagonaina ai so matou leo i totonu o taualumaga ma le sauni atu o nu'u ma alalafaga i le palotaina o ni ta'ita'i ma se Palemene Samoa mo le isi lima tausaga (Mati 2011-Mati 2016).

* Ua le mautinoa se lumana'i o tupulaga talavou ma tupulaga mulimuli mai ona ua alia'e o fa'aletonu o le tamao'aiga o Samoa e mafua lea mai fafo ( Saunoaga Minisita Tupe i Le Tala Fa'atatau o le Tupe 2010/2011 : itulau 2).

* Ua le mautinoa se lumana'i o tupulaga talavou ma tupulaga mulimuli mai ona ua nofo 'aitalafu si o tatou atunu'u i atunu'u ma fa'alapotopotoga ma kamupani tupe i fafo. O le aitalafu o tula'i mai nei e SAT$604.71 miliona po le 42.8 pasene o le tamao'aiga tu'ufa'atasi o si o tatou atunu'u laititi. O lona uiga o tupulaga talavou ma tupulaga mulimuli mai latou te tau'ave le mamafa o le totogiina o nei aitalafu.

* Ua le mautinoa se lumana'i o tupulaga talavou ma tupulaga mulimuli mai ona ua sui fa'avae maumaututu mai o tatou tua'a ina ua tula'i mai le Tulafono Mo le Resitalaina o Fanua Samoa 2008. Lona uiga o le a le toe puipuia fanua e o tatou aiga potopoto. O lona uiga o le auala lea e pulea ai o tatou fanua e atina'e mai fafo ma e le maua ai se manuia o aiga potopoto ma alalafaga.

* Ua le mautinoa se lumana'i o tupulaga talavou ma tupulaga mulimuli mai ona e le o fa'asalalauina le tulaga tonu i le a'ofa'i ma le pasene o e le o maua ni galuega ma ni fuafuaga maumaututu e fo'ia ai le leai o ni galuega. Pau o le mea o va'aia pea, o le su'etupe o le fanau laiti a e le a'o'oga, ma le fa'ateteleina o le gaoi i totonu o nu'u ma alalafaga. O le atugaluna, o le galala i le fia maua o ni tupe e aiga o le a su'e tupe ai i auala e le fa'atagaina e le tulafono e iai le fa'atauina o fuala'au fa'asaina, po o 'auupega pei o fana mai atunu'u i fafo.

* Ua le mautinoa se lumana'i o tupulaga talavou ma tupulaga mulimuli mai talu ai o tulaga fa'aletonu ua tula'i mai nei, ua tutupu mai a o itu-tasi taualumaga a lo tatou Palemene ona e le o iai se Itu Agai e ala atu ai ni faitioga ma ni finagalo fia fa'aalia o Samoa atoa. Lona uiga o se tulaga e le temokarasi ma e le kerisiano.

E ui lava la ina ua iai atina'e va'aia i totonu o si o tatou atunu'u, pei o 'auala fou, eletise, feso'ota'iga i telefoni, polokalama o le puleaina o vai taumafa ma vai lafoa'i, uafu ma taulaga, atina'e mo turisi ua iai nei fale talimalo e iva, le fuafuaga i Casino mo e tafafao mai i Samoa, a e o lo'o fa'alogoina pea le malosi o le si'uleo o le mativa ma le mafatia e le gata o le taugata o le soifuaga a e o le le maua o measina taua pei o vai taumafa, o taumafa masani, o fesoasoani mo gasegase tigaina, taugata o pasese feoa'i a e maise i nu'u tu mamao ma le taulaga, ma le taugata o fa'alavelave e aofia ai saofaga i lotu ma tapua'iga.

Ua matou talitonu o le manuia o Samoa a taeao e mana'omia ai ta'ita'i alolofa i tulaga o le le mautinoa o le lumana'i o tupulaga talavou ma tupulaga mulimuli mai pei ona tolaulau atu i luga.

Ua matou talitonu fo'i o le manuia o Samoa a taeao, e mana'omia ai se Palemene e iai i totonu se itu Agai ina ia ala mai ai se finagalo su'esu'e ma fesilisili o Samoa a o le i pasia ni tulafono mo lo tatou atunu'u o Samoa.

O la matou tatalo ia maua e Samoa atoa ma le mamalu o le 'au palota le fa'autautaga loloto ma le tofa mamao e filifili ai so tatou Palemene e mapu iai to'omaga o tupulaga talavou ma tupulaga mulimuli mai.

MANUIA SAUNIUNIGA MO PALOTA LAUTELE IA MATI 2011.