Tulaga e tatau ona Mataala ai Samoa i tausaga 2011 i le 2016

A U T A L A V O U     M O    T A E A O

O a tulaga e ao ona mataala ai pea Samoa Atoa i le isi lima tausaga (2011-2016)? 

Ia malu puipuia le Fa'avae Tusia (Constitution) o Samoa sa tusia e o tatou tua'a mo le manuia ma le to'afilemu o Samoa atoa i aso nei ma a taeao.

O lo o tula'i mai pea le mataupu e fa'atatau i le tulafono mo le resitalaina o fanua Samoa (2008) na pasiaina e aunoa ma le fesiligia o aiga potopoto o i latou e ona fanua. O lea tulafono e resitalaina ai fanua Samoa o aiga potopoto  e se suafa matai e to'atasi.

O le Malo e alofa fa'amaoni i ona tagata e tatau ona uia auala ua fa'atonuina i totonu o le Fa'avae tusia a e le o le suiina o le Fa'avae tusia ina ia sao ai ni fuafuaga o fia fa'atino e le Malo po o nisi fo'i mai atunu'u i fafo.

E ao i le Palemene Fou o Samoa ona toe asia le mataupu ua taua i luga ona ua lamatia le to'afilemu o Samoa talu na tula'i mai lenei mataupu.

Ia fa'amautu le tulaga na tuto'atasi ai le Malo o Samoa – ina ia  'aua le ola fa'alagolago tasi i atunu'u i fafo ma faletupe i fafo.

O le tulaga e ao ona silafia e le mamalu o le atunu'u, e moni ua 48 tausaga talu ona tuto'atasi le Malo o Samoa a e ua ali a'e ua nofo aitalafu ua o'o i le piliona tala ana aitalafu. Talu ai ua malosi le tulei mai fafo ua fa'aititia ai le atina'e o o tatou lava 'ele'ele e maua ai galuega ma se manuia o o tatou lava tagata. I le taimi nei ua maua e atunu'u i fafo le manuia o Samoa e ala i tupe ua fa'atauina mai ai o so o se 'oloa e aofia ai ma tausami mai fafo. Ua avea fo'i le nofo aitalafu o si o tatou atunu'u ua lamatia ai o tatou fanua mo le totogiina o le mau aitalafu.

Ia manatua, ua pulea mai fafo tupe nono mo le atina'e o atunu'u ma malo 'ese'ese o le lalolagi. O lo o ua iai nei i totonu o Samoa ofisa o faletupe nono tupe o le lalolagi ma faletupe nono tupe mo atina'e i Asia ma le Pasefika. 

O le ala lea e ao ai ona mataala o aiga ma nu'u ona o nisi fuafuaga e faia e le Malo ma atunu'u i fafo, o faletupe mai fafo, po o kamupani tetele mai fafo e le o silafia e le lautele. Ua tele atunu'u ua oi tagatanu'u i le mativa ona o ni maliega fa'ale-malo ua faia ma atunu'u po o kamupani mai  fafo, e pei ona ua iai nei o ni fa'asea ona o polokalama mai Saina. Manatua, e leai se fesoasoani e 'aumai fua mo tagata Samoa. E tatau lava na toe totogi. 

O fea la se lumana'i o fanau ma tupulaga fai mai pe afai ua lamatia fanua Samoa ma nofo aitalafu Samoa I aso nei?

Ina ia tau mamao ma ta'ita'i o le Malo ma o latou ofisa ma matagaluega le fili lea ua ta'ua o le le fa'amaoni ma le le tonu (corruption) i le fa'atinoina o tiute ma galuega mo le lelei o tagata uma.

O se Malo e fa'amaoni i ona tiute o le tautuaina o tagata Samoa e fa'ailoa ma ta'uta'u atu ana tonu ma fuafuaga.  Na te fa'ailoa atu i le atunu'u o ni fuafuaga pe saili fo'i le finagalo o nu'u ma alalafaga a o le i fa'amautuina ni tonu. E taua tele le fa'ailoa atu a e maise lava o le fa'aaogaina o ni fesoasoani ua ofoina mai i fafo. O se fa'ata'ita'iga o le fesoasoani $9.85 milion ua sainia ai le maliega ma atunu'u Europa mo le atina'e o fa'alapotopotoga e le o iai i totonu o le Malo ua tu'ufa'atasia i lalo o le fa'amalumalu a SUNGO. Ua iai nei se polokalame atina'e mo autalavou ua fa'atino e le Ekalesia Fa'apotopotoga Kerisiano i  Lelepa Savai'i  ua lagolagoina e SUNGO. E taua tele le silafia e le mamalu o le atunu'u le fa'aaogaina o ia tupe ma le toe totogiina e tusa o le mana'o o e foa'i mai Europa.

Mo le lelei atili o le va fealoaloa'i o le Malo ma e ua tautuaina e le Malo, e ao ona iai se Tulafono ina ia faigofie ona silafia ma malamalama le atunu'u i ni fuafuaga a le Malo ua le malamalama ai. E ta'ua lea tulafono o Sa'olotoga i upu tusitusia ( Freedom of Information Act).

IA MANUIA SAMOA ATOA

www.autalavoumotaeao.blogspot.com

facebook: Autalavou Mo Taeao                                                                            

Fa'amalosi'aga i Sui Faipule Tuto'atasi fa'amanuiaina

A u t a l a v o u  M o  T a e a o

Fa'amalosi'aga i Sui Faipule ua fa'amanuiaina e tau'ave tiute a Faipule Tuto'atasi (Independents)

Aisea ua valuvalusia ai a'a o le fau?

1 - Puipui ina ia Malu le Fa'avae Tusia (Constitution) o Samoa

O le tatou fa'avae tusia, le Constitution, o se fa'avae e matua taua i le soifuaga o Tagata Samoa uma ma e le so'ona tagofia e se tasi pe suia e aunoa ma le pule tatau poo se fa'atagaina mai le pa'ia ma le mamalu o Samoa atoa. E le ose mea e tatau ona fesuia'i so'o pei o se mea fa'ata'atia. Afai e sui,  e tatau ona malilie muamua iai le atunu'u aua  o le latou fa'avae.

O le fa'avae lenei o lo o fa'amaumauina ai aia tatau a tagata Samoa ta'ito'atasi ma le aia e fa'atuina ai se Malo Tuto'atasi o Samoa. O le mea ua tula'i mai, ua avea le tula'i mai o faigamalo a le HRPP i tausaga e tele ma mea ua manatu ifo ai latou lava ua tatau ona latou suia le fa'avae ina ia fa'amausali ina ai pea le pulega a le latou Pati. Ua iai suiga e tele ua latou faia i le fa'avae i tausaga ua mavae e aunoa ma se palota fa'alaua'itele a le atunu'u. E iai le suiga o le resitalaina o fanua atoa ma nisi tulaga tau le Palemene. Ua latou fesuia'i puipuiga maumau tutu sa fofoaina mai e Tupu ma Tamali'i na maliu fasia ma fa'aaunu'uina ona o lenei fa'avae. A o lea ua fa'atama'i ma sui i se auala e le tatau. O lenei fa'avae ua fai ma mea ta'alo a le HRPP. Ua tatau nei ona taofia lea tulaga.

I le palota talu ai nei, na tula'i mai ai le fuainumera o sui Tuto'atasi (Independents) e 7. O lona uiga a faia se palota i le Palemene, ina ia suia le fa'avae, e mafai e nei Sui Tuto'atasi fa'apea ma sui a le Tautua ona latou aufa'atasi e taofia se fesuia'iga o le fa'avae. Ua lava a latou numera tu'ufa'atasi e taofia ai se suiga matuia e ono lepeti ai aia tatau a tagata Samoa o loo fa'amautuina i le fa'avae.

O le mea lea ua fa'atalosagaina ai e le Autalavou Mo Taeao (AMT) sui Tuto'atasi nei, ina ia Tuto'atasi pea e pei ona sa latou manumalo ai i le faiga palota, a e maise pe a iai ni palota mo le suiga o le Fa'avae o Samoa. Ia sili le latou manatu i le fa'avae ina ia mautu ma tumau mo le lumana'i o tupulaga fai mai aua e sui faiga ae le suia fa'avae.  

2 – Ia iai nei loa se Palemene e le toe faigofie ai ona pasia o tulafono aoao se i vagana ua au'ili'ili ona talanoaina ma fefulia'i i totonu o le Palemene o Samoa.

O le mafua'aga lea na pasia ai tulafono pei o le Tulafono e Lesitalaina ai Fanua Samoa (2008),  tulafono e fausia ai Kasino mo tagata mau i fafo e asiasi mai i Samoa, tulafono na suiina ai ta'avale ma le itu e feoa'i ai ta'avale, tulafono e fa'asino i le puleaina o vaitaumafa ma nisi lava tulafono.

E ui lava ua iai le Itu Agai e to'a sefulutolu (13), a e o le iai  fo'i o Sui Tuto'atasi, o le a mautinoa ai se suiga i tulaga o felafolafoa'iga a e le i pasiaina mataupu tau tulafono aoao. O le agaga lea ua talosaga ai le Autalavou Mo Taeao ina ia a'e se tofa ia outou susuga ina ia tumau ma fa'amamaluina pea outou tofi o Faipule Tuto'atasi.  

Ua iai so matou fa'atuatuaga ia outou susuga Faipule Tuto'atasi

e mafai e finagalo autasi  ona ta'ita'i finagalo ma fa'afoeina se tofa sa'ili a e maise i ni mataupu e tatau ai ona su'e le finagalo lautele o Samoa atoa.

Talu ai O le AUTALAVOUMOTAEAO o se fa'alapotopotoga ua tu'ufa'atasia ai  manatu o autalavou mai atunu'u i fafo ma Samoa, matou te 'ai'oi ma le fa'anaunau o se manuia o tupulaga talavou ma tupulaga fai mai, o io outou 'a'ao lea. Ia manuia taualumaga mo se Palemene o Samoa.

 

www.autalavoumotaeao.blogspot.com

facebook: Autalavou Mo Taeao

The Dream or the Reality. Which one do we Keep?

Throughout the world there is wave of enlightenment sweeping through the Arab world as people are waking up to the fact that those in power are there for the wrong reasons and that they, the people, are ultimately responsible for their own choices including who they decide will run their government and manipulate their resources. In S...amoa this wave is rising slowly, maybe not fast enough to influence this election cycle, but surely we are not giving up hope that our people will seize the moment and give notice to those in power that the days of arbitrary and unilateral decision making are over! For too long Samoans have been uninformed of their power to change their way of living. If these changes to taxation and standard of living continues they will surely rise up. AMT is the facilitator and the mobilizer. We hope this wave will be caught by our people through a program of education and information which AMT will be producing and broadcasting from here on out until we have the right people in Government and Samoa is safe from the clutches of foreign manipulation.

Ole galu e na ona faafua ae le fati, o le alagaupu lea oute manatu ai ma le popole ona o lenei galuega ua amata nei e le itulau lenei o le AMT poo le Autalavou Mo Taeao, ose amataga ise malaga mamao. E le o se mea faigofie pe lata mai fo'i le taunuuga ole tatou malaga. Oute faatulou atu i e na mua i malae aua ua fai i lagi le latou folauga ma ua mau mai i tia sa ma le agaga to'afilemu ona ua Tuto'atasi Samoa.

Ae paga lea ole galuega a tatou tua a ole a ma'umau ona ua faatalale tupulaga faimai ile faamautuina o lenei malo. Ua mua na sa'ili le oa ma le ola faaletino ae galo le pogai ua alai na tatou maua lenei manuia. E le taugofie le Tuto'atasi ma e le faapea ua tatou tuto'atasi ona tatou manatu ifo lea "Oi, ua lava lena. O lea ua tau le faamoemoe." E leai, e le'i tau le faamoemoe, Ua na'o se ata ua atagia mai ua pei ose miti e toe mou atu pe afai tatou te le uu lima faatasi e tauave le galuega o le filifilia lea o sui agavaa mo le malo.

Afai tatou te le teuteuina lenei la'au ma faasusu e i'u lava na pe. Ole mea lea oute toe faalatalata atu ai i uso ma tuafafine ae maise le Autalavou, aua le faatamala. Ala mai. Tu i luga. Ua vave na tatou toli le fua ole laau e le'i matua lelei. Toe vaai faalelei aua o loo aga'i mai aso faigata pe afai tatou te le fetagofi e laga ese vaofefe ma isi manu iti leaga e ono lepetia ai le soifua lelei a si o tatou malo. O le malosi o lenei malo e le o le Palemia poo lana kapeneta. E le o faleoloa ma mea toto, E le o tupe poo fale tetele ua fausia i tupe mai fafo.

Ole manuia o Samoa e afua mai ia i tatou nei, o tagata nuu a Samoa. A vaivai le tatou faatuatua ma le tatou faamoemoe ma tatou faatagaina tagata sese i tau'aveina le tofi mo le isi 5 tausaga, o lona uiga ua pa u lava le samala i le ulu ole fao. O si ou lava lima ua toe pa ia ai lou mata. Aua la e te toe tagi pe afai o le a oo mai faigata ma puapuaga. O le mea lava na e loto iai aua ua e palota ma le manatu faatauvaa i le malosi o lau ekise. Toe taga'i lelei Samoa, e le aumaua avanoa faapenei.
Samoa Tula'i.

The State of Freedom in Samoa

FaaSamoa vs. Democracy. Can the two systems cohabitate? The current Samoan political machine has manipulated this naive system of personal choice into one where the odds favor the party in power. Is it a Samoan tactic or is it just a gre...ed motivated power move, which is born of shrewd and/or cowardly motivations? Unwilling to let the system decide for itself through unmolested elections, the parties in power are afraid they will lose an election if they do not stack the deck in their favor. Is this confidence in their ability to govern or an acknowledgment of their failure as a government but refusal to relinquish power. If this is the case then HRPP are determined to retain power with or without the popular support of the people. In other words it is not a democracy.

Samoa e. Ua leva na tatou mafuta ma lenei ituaiga malo o le faatemakorasi ae e le'i manino lava le mata o le vai po o lea tonu lava le uiga o lea igoa, o le Faatemakorasi. O le uiga o le upu Temakoasi poo le Democracy, o se faiga malo e mafua lana pule i le Mau a tagata ta'itasi oloo nofoia lea atunuu. Ose tuufatasiga o manatu ma ioega a tagata uma ua iai le aia tatau e palotaina sui tauva mai a latou itumalo ona ua silafia e le tagata palota o le sui lenei e faamaoni ma agavaa mo le tofi,

Ole Faatemakorasi e ala na malosi ona oloo amanaiaina e le Malo manatu lautele o Tagata nuu i soose faaiuga fai poo se tulafono e pasia. O lea tulaga e mafua ona o sui ia ua latou palotaina mai a latou itumalo oloo aumaia le finagalo lautele ole itumalo i taupulega fai a le Fono tele. I le faatemakorasi e le pulea e se tagata to'atasi le malo. E afua mai le malosi a le malo i le sapasapaia o tagata taitoatasi o aiaiga fai, ina ua iai se latou leo i le faiga malo. O lona uiga o oe le tagata Samoa e iai lau aia tatau i pulega fai a le Malo. A fai e faatapulaaina lena aia e se tasi ua malepe iina le faatemakorasi.

E iai auala faaalatua e mafai ai ona faatapulaaina ai le aia a tagata nuu e nisi ua iai le pule i totonu o faiga malo, ma latou taofia ai le mafai e se tasi poo se itu ona latou tula'i mai i se tauvaga faapalota. O ia tulaga e faanoanoa ai le agaga aua ua faaoga sese le pule na avatu e tagata nuu o Samoa i inei auauna, mo le lelei a Samoa, ae ua latou taumafai e uumia pea le puleaga a le malo ise auala faatogafiti. O ia auala faatogafiti ua alai ona iai se agaga, e logologo atu, ile atunuu pele, ua mana'omia le tou mataala ma le tou filiga e faatumauina le amiotonu o faiga malo a Samoa aua ole malo faitele.

Afai oloo e manatu mama i lenei aia tatau ua e uumia, ua e nofo lava oe ma faapologa oe. Aua e te faatauina lenei palota ise tupe poo se tulaga faaleaiga. E le o le auga tonu lea o le faiga malo faatemakorasi. Ua i ou lava lima lau manuia ma lau malaia. Afai ete palota ma le faatamala ua leai sou faamoemoe mo le lumanai ma le soifua lelei o tupulaga fai mai a Samoa. Ia teu lau palota e pei ose ario ma faaoga tatau ina ia e filifilia ai se tagata amiotonu ma alofa moni ia te oe, ma lou aiga, ma si o tatou atunuu o Samoa. Samoa Tula'i ma fai lau faiva. O ou mama na.
Autalavou Mo Taeao

Mo le silafia o e o le a palota Aso 4 Mati 2011 i Samoa

AUTALAVOU MO TAEAO

Matou te vala'au atu ma le fa'anaunau ia Samoa atoa

O ou pa'ia ma ou Sa ua maualuga tele e leai so matou poto e agatonuina.

Peita'i i le agaga o le Taeao o le Talalelei i Mataniu Feagai ma le Ata, matou te fa'alatalata atu ai e fa'apenei:-

Tatou Su'e Fa'atasi Se manuia o Samoa a Taeao - e auala mai i faiga palota ua sauni atu iai Samoa i le Aso Faraile Aso 4 Mati 2011

O Tulaga nei ua matou 'ai'oi ai i le Atua le Tupu Silisili o Samoa ina ia lagonaina ai so matou leo i totonu o taualumaga ma le sauni atu o nu'u ma alalafaga i le palotaina o ni ta'ita'i ma se Palemene Samoa mo le isi lima tausaga (Mati 2011-Mati 2016).

* Ua le mautinoa se lumana'i o tupulaga talavou ma tupulaga mulimuli mai ona ua alia'e o fa'aletonu o le tamao'aiga o Samoa e mafua lea mai fafo ( Saunoaga Minisita Tupe i Le Tala Fa'atatau o le Tupe 2010/2011 : itulau 2).

* Ua le mautinoa se lumana'i o tupulaga talavou ma tupulaga mulimuli mai ona ua nofo 'aitalafu si o tatou atunu'u i atunu'u ma fa'alapotopotoga ma kamupani tupe i fafo. O le aitalafu o tula'i mai nei e SAT$604.71 miliona po le 42.8 pasene o le tamao'aiga tu'ufa'atasi o si o tatou atunu'u laititi. O lona uiga o tupulaga talavou ma tupulaga mulimuli mai latou te tau'ave le mamafa o le totogiina o nei aitalafu.

* Ua le mautinoa se lumana'i o tupulaga talavou ma tupulaga mulimuli mai ona ua sui fa'avae maumaututu mai o tatou tua'a ina ua tula'i mai le Tulafono Mo le Resitalaina o Fanua Samoa 2008. Lona uiga o le a le toe puipuia fanua e o tatou aiga potopoto. O lona uiga o le auala lea e pulea ai o tatou fanua e atina'e mai fafo ma e le maua ai se manuia o aiga potopoto ma alalafaga.

* Ua le mautinoa se lumana'i o tupulaga talavou ma tupulaga mulimuli mai ona e le o fa'asalalauina le tulaga tonu i le a'ofa'i ma le pasene o e le o maua ni galuega ma ni fuafuaga maumaututu e fo'ia ai le leai o ni galuega. Pau o le mea o va'aia pea, o le su'etupe o le fanau laiti a e le a'o'oga, ma le fa'ateteleina o le gaoi i totonu o nu'u ma alalafaga. O le atugaluna, o le galala i le fia maua o ni tupe e aiga o le a su'e tupe ai i auala e le fa'atagaina e le tulafono e iai le fa'atauina o fuala'au fa'asaina, po o 'auupega pei o fana mai atunu'u i fafo.

* Ua le mautinoa se lumana'i o tupulaga talavou ma tupulaga mulimuli mai talu ai o tulaga fa'aletonu ua tula'i mai nei, ua tutupu mai a o itu-tasi taualumaga a lo tatou Palemene ona e le o iai se Itu Agai e ala atu ai ni faitioga ma ni finagalo fia fa'aalia o Samoa atoa. Lona uiga o se tulaga e le temokarasi ma e le kerisiano.

E ui lava la ina ua iai atina'e va'aia i totonu o si o tatou atunu'u, pei o 'auala fou, eletise, feso'ota'iga i telefoni, polokalama o le puleaina o vai taumafa ma vai lafoa'i, uafu ma taulaga, atina'e mo turisi ua iai nei fale talimalo e iva, le fuafuaga i Casino mo e tafafao mai i Samoa, a e o lo'o fa'alogoina pea le malosi o le si'uleo o le mativa ma le mafatia e le gata o le taugata o le soifuaga a e o le le maua o measina taua pei o vai taumafa, o taumafa masani, o fesoasoani mo gasegase tigaina, taugata o pasese feoa'i a e maise i nu'u tu mamao ma le taulaga, ma le taugata o fa'alavelave e aofia ai saofaga i lotu ma tapua'iga.

Ua matou talitonu o le manuia o Samoa a taeao e mana'omia ai ta'ita'i alolofa i tulaga o le le mautinoa o le lumana'i o tupulaga talavou ma tupulaga mulimuli mai pei ona tolaulau atu i luga.

Ua matou talitonu fo'i o le manuia o Samoa a taeao, e mana'omia ai se Palemene e iai i totonu se itu Agai ina ia ala mai ai se finagalo su'esu'e ma fesilisili o Samoa a o le i pasia ni tulafono mo lo tatou atunu'u o Samoa.

O la matou tatalo ia maua e Samoa atoa ma le mamalu o le 'au palota le fa'autautaga loloto ma le tofa mamao e filifili ai so tatou Palemene e mapu iai to'omaga o tupulaga talavou ma tupulaga mulimuli mai.

MANUIA SAUNIUNIGA MO PALOTA LAUTELE IA MATI 2011.

The message is powerful and needs to be seen and heard by ALL Samoans even if you are from American Samoa, its the same situation different political system.  The youth are the future of our people and its time they stood up and made their voices known.  Rise Up Samoa!

Welcome.

E faatalofa atu ile mamalu o alii ma tama'ita'i o loo lavea i le itu lenei o le AMT.  welcome to AMT the new orgnaization for youth issues and aspirations.  this page was started by certain individuals who have a vision for the Youth of Samoa.  They call this the Autalavou Mo Taeao and their vision is to see Samoa's Youth become more involved in the planning and discussion of Samoa's future.  Why?  well because you will be living in that future.  you and your children and grandchildren.  that means what is decided now will affect you and your future so we suggect you get involved.
The plan is to form this group or social network using facebook and other social media to create a dialogue between Samoan youth in Samoa, New Zealand, Australia and the USA...or whereever they may be.  it doesnt matter, Samoan youth need to become organized and ready to start taking the reigns of power from their elders when the time is right.  Our current leaders do not seem to care for the future of Samoa and are making decisions that are beneficial only to maintaining their status quo. They dont care if Samoan land that was protected under our constitution and passed down from one generation to another is lost to commercial banks or foreign investors? They are more concerned with what they can secure for themselves and today.  For them tomorrow is a dream and they wont be here to enjoy it.  So all of the plans affecting Samoa today are being mortgaged on the backs of you the youth becasue when it is time for you to take over, there will be nothing for you to manage.  Today's government and the leaders of today are not looking out for your best interests.  They do not have your back.
This is the short sightedness we here in AMT are trying to avoid and prevent.  We want a Samoa that has a bright future with self determination and self reliance.  Not a future of owing the World Bank, the Asian Development Bank, China, New Zealand and Australia billions of dollars that we cannot afford. the time to stand up and fight for your rights is now.  This is the first step i a program of empowerment through awareness and action that we here at AMT seek so that when the time is right Samoan Youth can make decisions for their own future and not be stuck with something they had no control over.